Супрацоўнікі ДАІ 22 сакавіка затрымалі чатырох актывістаў руху салідарнасьці «Разам», пазьней адпусьцілі. На двух чалавек склалі адміністрацыйныя пратаколы, паведаміла БелаПАН Надзея Батура.
Пратаколы за непрышпіленыя рамяні
Паводле Батуры, на яе і на сьвятара не прызнанай у Беларусі Беларускай аўтакефальнай праваслаўнай царквы Віктара Кавалькова склалі пратаколы за непрышпіленыя рамяні бясьпекі на заднім сядзеньні. Затрыманага Сяргея Мацкойця адпусьцілі без пратаколу. Кіроўца затрыманага аўтамабіля Віталь Лухвіч спачатку заставаўся ў РУУС Савецкага раёну сталіцы, бо яго машына нібыта знаходзіцца ў вышуку. Пазьней яго адпусьцілі без пратаколу.
У Хатынь таксама паехаў Макей
Актывісты рушылі ў Хатынь, каб ускласьці кветкі да мэмарыялу ў памяць аб загінулых ад рук нацыстаў жыхарах вёскі.
Як паведамлялася, 22 сакавіка а 15.00 мэмарыяльны комплекс «Хатынь» павінна наведаць група дыпляматаў на чале зь міністрам замежных справаў Уладзімерам Макеем. Менавіта з гэтым Батура зьвязвае затрыманьне актывістаў.
«Гэта ўзурпавана ўладай. Аказваецца, простым грамадзянам а палове на 12-ю дня нельга ўскласьці кветкі, аказваецца, гэта злачынства. Я пераканалася, што нас праслухоўвалі. Машына ДАІ чакала канкрэтна нас», — сказала Батура.
Паводле інфармацыі МЗС, візыт дыпляматаў прысьвяцілі 76-й гадавіне хатынскае трагедыі.
