Лінкі ўнівэрсальнага доступу

Пракурор запатрабаваў 11 гадоў зьняволеньня для былога дырэктара менскага Палаца спорту


Менскі Палац спорту

21 сакавіка ў судзе Маскоўскага раёну Менску з апошнім словам выступіў былы дырэктар менскага Палаца спорту Сяргей Прановіч. Пракурор папрасіла прызначыць яму пакараньне ў выглядзе 11 гадоў калёніі.

Як паведамляе Tut.by, 58-гадовага Прановіча судзяць за атрыманьне хабараў і махлярства. Расьсьледаваньне вёў КДБ, там прыйшлі да высновы, што ён 6 гадоў займаўся паборамі — усяго выяўлена амаль 178 выпадкаў на суму прыкладна 78 тысяч рублёў.

Падчас працэсу пракурорка тры гадзіны зачытвала, як яму штомесяц давалі хабар танцавальныя клюбы, арганізатары выставаў сабак і канцэртаў замежных выканаўцаў, прадстаўнікі выставачных кампаній.

На першым паседжаньні Прановіч сказаў суду, што з абвінавачваньнем згодны часткова. Празь месяц судовага сьледзтва яму далі апошняе слова.

«Я ўсьвядоміў сваю віну і раскайваюся ў зробленым. З улікам свайго ўзросту і стану здароўя прашу суд не караць мяне строга і дазволіць узяць удзел у выхаваньні маленькага дзіцяці», — на гэтых словах ягоны голас абарваўся.

Перад гэтым пракурор Алена Крупеніна папрасіла суд прызнаць яго вінаватым ва ўсіх эпізодах і прызначыць пакараньне — 11 гадоў пазбаўленьня волі з канфіскацыяй маёмасьці. Плюс штраф у 300 базавых велічынь (7650 рублёў) і забарона на працягу 5 гадоў займаць пэўныя пасады.

Вырак маюць абвясьціць 29 сакавіка.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG