У Беларусі пабывала дэлегацыя швэдзкай камісіі ў пытаньнях абароны на чале з былым сьпікерам парлямэнту і міністрам абароны Б’ёрнам фон Сюдоў.
Камісія зьяўляецца пляцоўкай для дыялёгу паміж урадам Швэцыі і прадстаўленымі ў парлямэнце палітычнымі партыямі.
У яе складзе — другі віцэ-сьпікер Рыксдагу Лота Ёнсан Форнарв, сябры камітэту па абароне, палітычны дырэктар МЗС Швэцыі Ганна-Карын Энэстром, профільныя экспэрты.
Як паведамляе сайт беларускага замежнапалітычнага ведамства, у рамках візыту прайшлі перамовы з намесьнікам міністра замежных спраў Беларусі Алегам Краўчанкам. Сярод іншага разгледжаныя мэханізмы ўзаемадзеяньня з эўрапейскімі рэгіянальнымі арганізацыямі.
Гэтаксама швэдзкія экспэрты наведаліся ў Палату прадстаўнікоў, дзе адбылася сустрэча з камісіяй у міжнародных справах і нацыянальнай бясьпецы.
Як гаворыцца на сайце Палаты прадстаўнікоў, бакі абмеркавалі геапалітычную і ваенна-стратэгічную сытуацыю ў рэгіёне.
