Савет міністраў Беларусі 19 сакавіка прызначыў чыноўнікаў у органы кіраваньня каля 70 прадпрыемстваў у форме адкрытых акцыянэрных таварыстваў, каб павялічыць іх эфэктыўнасьць, піша БелТА.
Навошта прызначылі?
Паводле Дзяржаўнага камітэту маёмасьці, прызначэньні будуць садзейнічаць:
- павелічэньню эфэктыўнасьці арганізацыяў;
- укараненьню досьведу пабудовы сыстэмы кіраваньня гаспадарчымі таварыствамі.
-
Каго і куды прызначылі?
- Першага намесьніка прэмʼер-міністра Аляксандра Турчына прызначылі на «Гомсельмаш».
- Намесьніка прэмʼер-міністра Ўладзімера Кухарава — на «Гомельшкло» і «Бярозабудматэрыялы».
- Намесьніка прэмʼер-міністра Ігара Ляшэнку — на Менскі завод колавых цягачоў.
- Намесьніка прэмʼер-міністра Ігара Петрышэнку — у «АГАТ — сыстэмы кіраваньня» — кіроўную кампанію холдынгу «Геаінфармацыйныя сыстэмы кіраваньня».
Таксама кіраўнікоў міністэрстваў, ведамстваў ды іхных намесьнікаў прызначылі на:
- Горадзенскі шклозавод;
- «Віцязь»;
- «Беларускі мэталюргічны завод»;
- Слонімскую камвольна-прадзільную фабрыку;
- «Віцебскія дываны»;
- «Інтэграл»;
- «Магатэкс»;
- «Крыніцу»;
- «Белшыну»;
- Сьветлагорскі цэлюлёзна-кардонны камбінат.
Ва ўласнасьці дзяржавы знаходзіцца 404,1 мільярда акцыяў 405 акцыянэрных таварыстваў, гэта 69,3% ад агульнай колькасьці акцыяў, якія выпусьцілі ў краіне.