Паводле Сьледчага камітэту, ён атрымліваў ад індывідуальных прадпрымальнікаў матэрыяльныя каштоўнасьці.
Упраўленьне Сьледчага камітэту па Горадзенскай вобласьці распачало крымінальную справу на начальніка наваградзкай падатковай за хабарніцтва. Пра гэта СК паведамляе ў сваім тэлеграм-канале.
За матэрыяльныя каштоўнасьці, якія ён па інфармацыі сьледзтва атрымліваў ад індывідуальных прадпрымальнікаў, начальнік падатковай вырашаў пытаньні на карысьць прадпрымальнікаў. У прыватнасьці ён заніжаў падатковыя выплаты, не прыцягваў прадпрымальнікаў да адказнасьці за парушэньні заканадаўства.
Цяпер былы начальнік наваградзкай падатковай зьмешчаны пад варту з санкцыі пракурора. На яго маёмасьць і транспарт наклалі арышт. Яму пагражае да 10 гадоў пазбаўленьня волі.
