У Італіі пракуратура расьсьледуе абставіны гібелі 34-гадовай мадэлі з Марока Іман Фадзіл, якая памерла 1 сакавіка ў адным са шпіталёў Мілану. Яна магла быць атручаная радыёактыўнымі рэчывамі.
Танцорка была адным з ключавых сьведкаў у крымінальнай справе супраць былога прэм’ер-міністра краіны Сыльвіё Бэрлюсконі. Яго абвінавачваюць у подкупе сьведкаў на судзе па справе аб сэкс-вечарынках зь яго ўдзелам, дзе ён, як настойвала сьледзтва раней, займаўся сэксам зь непаўналетняй сэкс-работніцай. Пра гэта паведамляе агенцтва ANSA.
Фадзіл памерла празь месяц пасьля паступленьня ў шпіталь з болямі ў жываце. Перад сьмерцю яна распавяла, што баіцца, што была атручаная. Шэф-пракурор Мілану Франчэска Грэка распавёў агенцтву Reuters, што ў абставінах гібелі мадэлі ёсьць дзіўныя рэчы. «Лекары не змаглі вызначыць ніякай паталёгіі, якая магла б растлумачыць гэтую сьмерць», — заявіў ён. Офіс пракурора адзначыў, што мараканка памерла «пасьля працяглай агоніі». Папярэдняя таксыкалягічная экспэртыза паказала, што сьмерць магла наступіць ад атручэньня камбінацыяй радыеактыўных рэчываў, сьцьвярджае ANSA.
Фадзіл давала паказаньні на крымінальным працэсе па справе Бэрлюсконі ў 2012 годзе. Тады суд прысудзіў яго да сямі гадоў турмы за сэкс зь непаўналетняй сэкс-работніцай і злоўжываньне службовым становішчам. Яго абвінавачвалі ў арганізацыі на сваёй віле вечарынак, дзе ён і яго госьці займаліся сэксам з прастытуткамі. Фадзіл распавядала, што была на адной зь вечарынак, дзе маладыя дзяўчаты, часам у касьцюмах манашак, танчылі эратычныя танцы. На другой дзяўчына ў бялізьне танчыла для Бэрлюсконі стрыптыз у масцы футбаліста Раналдзіньё, які гуляў за футбольны клюб «Мілан», які належаў палітыку .
Прысуд па гэтай справе быў адменены ў 2014 годзе. Пракуратура Мілану завяла на Бэрлюсконі новую справу, цяпер яго абвінавачваюць у подкупе сьведак на папярэднім працэсе, каб тыя давалі ілжывыя паказаньні. Фадзіл павінна была выступаць і на гэтым судзе.
Сыльвіё Бэрлюсконі адмовіўся камэнтаваць сьмерць мадэлі. Паводле яго, ён ня быў зь ёй знаёмы і ніколі зь ёй не размаўляў.
