Прэзыдэнт Абдэлязіз Бутэфліка знаходзіцца ў аддзяленьні рэанімацыі шпіталя пры Жэнэўскім унівэрсытэце. Пра гэта паведаміў у суботу тэлеканал Al Mayadin.
Паводле яго інфармацыі, 81-гадовы палітык быў дастаўлены ў Швайцарыю на самалёце ў амаль непрытомным стане, і лекары вельмі хвалююцца за яго жыцьцё.
Першы інсульт здарыўся з Бутэфлікам у 2013 годзе. З тых часоў алжырскі лідэр перамяшчаецца толькі ў інвалідным крэсьле. Ён з цяжкасьцю гаворыць і вельмі рэдка зьяўляецца на публіцы, праводзячы шмат часу ў замежных клініках. Аднак гэтая акалічнасьць не перашкодзіла яму ў лютым вылучыць сваю кандыдатуру на чарговы пяцігадовы тэрмін. Прэзыдэнцкія выбары ў Альжыры адбудуцца ў красавіку.
У сталіцы Альжыру і іншых гарадах краіны, тым часам, праходзяць масавыя маршы пратэсту. Іх арганізавалі лідэры апазыцыі, якія выказалі сумнеў у здольнасьці прэзыдэнта рэальна кіраваць дзяржавай, і патрабуюць ад Бутэфлікі зьняць сваю кандыдатуру.
У красавіку споўніцца 20 гадоў, як Абдэлязіз Бутэфліка кіруе Альжырам.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў