Раніцай 28 лютага дзяжурны Менскага ізалятару часовага ўтрыманьня на вуліцы Акрэсьціна паведаміў карэспандэнту Свабоды, што ўсе затрыманыя ў сувязі з акцыяй, якая прайшла 26 лютага на Кастрычніцкай плошчы, дагэтуль знаходзяцца ў іх установе.
«Так, яны ў нас, званіце недзе праз паўтары гадзіны, можа, будзе вядома, ці павязуць іх у суд. Пакуль наконт іх каманды не было», — сказаў міліцыянт і пацьвердзіў, што гаворка пра Паўла Севярынца, Вольгу Мікалайчык, Арцёма Чарняка, якіх затрымалі ў аўторак 26 лютага, а таксама пра Леаніда Кулакова, затрыманага 27-га.
27 лютага актывісты, праваабаронцы і журналісты ўвесь дзень прачакалі працэсаў над затрыманымі ў Фрунзенскім, Цэнтральным і Першамайскім раённых судах Менску, але нікога з затрыманых туды так і не прывезьлі. Атрымаць камэнтар у прэсавай службы менскай міліцыі пакуль не ўдалося, там не падымаюць трубку.
26 лютага а 18-й гадзіне на Кастрычніцкую плошчу ў Менску выйшлі 10 чалавек у падтрымку беларускіх палітвязьняў. Акцыя цягнулася каля 25 хвілін.
Адзін зь лідэраў партыі БХД Павал Севярынец 21 лютага заклікаў выйсьці на Кастрычніцкую плошчу з партрэтамі палітвязьняў —Сьвятаслава Барановіча, Алеся Юркойця, Міхаіла Жамчужнага і іншых. Прычынай акцыі стаў перавод Барановіча з калёніі ў турму.
Як казаў Свабодзе Севярынец, форум «Свабоду палітвязьняў» вырашыў праводзіць такія акцыі да чэрвеня пад лёзунгам «Хочаце праводзіць Эўрапейскія гульні — выпускайце палітвязьняў!». Акцыя не была санкцыяваная уладамі.
Перад пачаткам акцыі на выхадзе з дому затрымалі яе ініцыятара Паўла Севярынца, а таксама Зьмітра Паліенку і Насту Гусеву. Падчас акцыі яе ўдзельнікаў міліцыянты не затрымлівалі і не папярэджвалі аб адказнасьці, але пасьля акцыі затрымалі Вольгу Мікалайчык і Арцёма Чарняка. На наступны дзень быў затрыманы Леанід Кулакоў.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў