Расея зьнішчыла пашкоджаныя пры транспартаваньні ракеты для комплексаў C-400, якія была прадала ў Кітай. Пра гэта 18 лютага паведаміў кіраўнік расейскай дзяржаўнай карпарацыі «Ростех» Сяргей Чэмезаў.
Па словах чыноўніка, судна, якое перавозіла ракеты, трапіла ў шторм. Мацаваньні, якія трымалі абсталяваньне, ня вытрымалі, і яно моцна пашкодзілася.
Чэмезаў заявіў, што Расея вырабляе новыя ракеты для Кітая. Сума кантракту на пастаўку шасьці дывізіёнаў С-400 складае больш за тры мільярды даляраў. Пра пачатак паставак абвясьцілі ў студзені 2018 году.
У верасьні 2018 году Злучаныя Штаты ўвялі санкцыі супраць Міністэрства абароны КНР за куплю 10 расейскіх зьнішчальнікаў Су-35 і зэнітна-ракетных комплексаў С-400.
Кітай стаў першай краінай, у якой ЗША ўжылі абмежаваньні за супрацоўніцтва з Расеяй.
Раней паведамлялася, што Расея і Індыя заключылі кантракт на пастаўку пяці дывізіёнаў зэнітна-ракетных комплексаў С-400. Кантракт коштам больш за 5 мільярдаў даляраў заключаны ў час візыту ў Дэлі прэзыдэнта Расеі Ўладзіміра Пуціна восеньню 2018 году. За куплю расейскага ўзбраеньня Індыі могуць пагражаць санкцыі з боку ЗША.
Зэнітна-ракетныя комплексы С-400 прызначаныя для зьнішчэньня сродкаў паветрана-касьмічнага нападу. Іх кіраваныя ракеты могуць паражаць аэрадынамічныя цэлі на вышынях да 27 кілямэтраў, а балістычныя цэлі — да 25 кілямэтраў.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў