Жыхара Мядзельшчыны асудзілі на 6 гадоў пазбаўленьня волі за тое, што ён разам са знаёмым вывез двух мужчынаў у лес. Аднаго з пацярпелых прывязалі да машыны і цягалі па зямлі. Таксама асуджаны мусіць сплаціць штраф 2550 рублёў, піша прэс-служба суду Мядзельскага раёну.
Што адбылося?
Абвінавачаны С. у стане алькагольнага апʼяненьня разам з Л. вывезьлі пацярпелага А. да вёскі Азаркі-Дворышча на Мядзельшчыне, дзе зьбілі мужчыну. Пасьля прымусілі яго сесьці ў машыну і адвезьлі яго ў лес. Але праз супраціў пацярпелага выцягнуць яго з машыны для далейшага зьбіцьця, не атрымалася.
Таксама С. разам з Л. зьбілі ў лесе пацярпелага П., прывязалі яго рамянямі бясьпекі да аўто і працягнулі па зямлі амаль на 700 мэтраў. У выніку пацярпелы П. атрымаў лёгкія цялесныя пашкоджаньні.
Навошта яны гэта рабілі?
С. і Л. спрабавалі такім чынам высьветліць, хто скраў у Л. 50 рублёў.
Чаму судзілі толькі аднаго?
Крымінальную справу супраць Л. спынілі празь яго сьмерць.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў