Лінкі ўнівэрсальнага доступу

У Віцебску за наркотыкі затрымалі шклоўскага міліцыянта?


Ва ўпраўленьні Сьледчага камітэту па Віцебскай вобласьці пракамэнтавалі распаўсюджаную ў сеціве інфармацыю пра меркаванае затрыманьне опэрупаўнаважанага Шклоўскага РАУС.

Зьвесткі пра гэта распаўсюдзіў у Telegram блогер NEXTA.

Парталу Tut.by іх пацьвердзіла інфармаваная крыніца.

Афіцыйны прадстаўнік упраўленьня Сьледчага камітэту па Віцебскай вобласьці Аксана Лазько паведаміла карэспандэнту Свабоды, што 10 лютага супрацоўнікі міліцыі «падчас апэратыўна-вышуковых мерапрыемстваў па спыненьні дзейнасьці інтэрнэт-крамы па продажы наркатычных сродкаў і псыхатропных рэчываў» затрымалі 24-гадовага жыхара Шклоўскага раёну.

«У яго пры асабістым вобшуку знайшлі і сканфіскавалі асабліва небясьпечнае псыхатропнае рэчыва альфа-PVP масай больш за 29 грамаў. Віцебскі гарадзкі аддзел Сьледчага камітэту распачаў крымінальную справу па ч. 3 арт. 328 КК РБ. Мужчына затрыманы, зь ім праводзяцца неадкладныя сьледчыя дзеяньні».

На пытаньне, ці сапраўды гэта быў опэрупаўнаважаны Шклоўскага РАУС, Аксана Лазько не адказала.

У Шклоўскім РАУС таксама не адказалі на пытаньне карэспандэнта Свабоды, ці сапраўды затрыманы опэрупаўнаважаны, і параілі зьвярнуцца ў прэс-службу Магілёўскай абласной міліцыі. На момант публікацыі атрымаць адтуль камэнтар нам не ўдалося.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG