Падчас візыту дзяржсакратара ЗША Майка Пампэо ў Вугоршчыну, Славаччыну і Польшчу на гэтым тыдні, ён паспрабуе кампэнсаваць недахоп актыўнасьці з боку ЗША ў працы з краінамі Цэнтральнай Эўропы.
Паездка Пампэо пачнецца 11 лютага з наведваньня сталіцы Вугоршчыны Будапэшту. 12 лютага ён прыедзе ў Браціславу, сталіцу Славаччыны, дзе гэта будзе першы візыт госьця такога высокага ўзроўню з ЗША за апошнія 20 гадоў.
«Нашы дыпляматычныя кантакты накіраваныя на тое, каб канкураваць за пазытыўны ўплыў і паказаць нашым саюзьнікам у рэгіёне, што ЗША падтрымліваюць іх і праяўляюць цікавасьць да іх, каб прадставіць альтэрнатыву Кітаю і Расеі», — заявіў высокапастаўлены прадстаўнік адміністрацыі на ўмовах ананімнасьці.
Вашынгтон, як паведамляе Голас Амэрыкі, занепакоены штораз большай прысутнасьцю Кітаю ў Цэнтральнай Эўропе і, у прыватнасьці, экспансіяй у Вугоршчыне і Польшчы кампаніі Huawei Technologies, найбуйнейшага ў сьвеце вытворцы тэлекамунікацыйнага абсталяваньня.
Асноўная частка візыту Пампэо ў Польшчу будзе зьвязаная з двухдзённай амэрыканскай канфэрэнцыяй «Будучыня міру і бясьпекі на Блізкім Усходзе», якая пачнецца 13 лютага.
Вашынгтон спадзяецца заручыцца падтрымкай у справе ўзмацненьня ціску на Іран, каб пакласьці канец яго зламысным, як лічаць ЗША, паводзінам на Блізкім Усходзе і дамагчыся спыненьня яго ракетна-ядзернай праграмы.
Пакуль незразумела, якія эўрапейскія сталіцы накіруюць свае дэлегацыі на канфэрэнцыю, якую кіраўнік іранскага МЗС Мухамад Джавад Зарыф назваў «безнадзейным антыіранскія цыркам», дадае Голас Амэрыкі.
