Новы прэм’ер-міністар Латвіі Крышʼяніс Карыньш заявіў, што чальцам ягонага ўраду ня варта ўдзельнічаць у захадах, прысьвечаных памяці легіянэраў Waffen SS. Шэсьці з гэтай нагоды штогод праходзяць у цэнтры Рыгі.
Як растлумачыў палітык у інтэрвію газеце Latvijas avīze, калі хто-небудзь хоча ўшанаваць жаўнераў Латвіі, для гэтага ёсьць спэцыяльная дата — Дзень Лачплесіса (Дзень памяці герояў) 11 лістапада.
Карыньш адзначыў, што ў краіне ўжо стала традыцыяй адсутнасьць прадстаўнікоў ураду на ўрачыстасьцях каля помніка Свабоды. «Як і ў мінулыя гады, гэты дзень як прыйшоў, так і пройдзе», — падкрэсьліў прэмʼер.
Крышʼяніс Карыньш адзначыў, што ён сам унук легіянэра і разумее «сапраўднае паходжаньне 16 сакавіка», але параіў прыхільнікам жаўнераў Waffen SS адзначаць гэты дзень на могілках.
16 сакавіка ў Латвіі адзначаецца неафіцыйны Дзень памяці латыскіх легіянэраў у памяць загінулых байцоў латыскага добраахвотніцкага легіёну, які ўваходзіў у склад войскаў СС.
Прэм’ер Латвіі лічыць, што рэзананс вакол неафіцыйных шэсьцяў у цэнтры Рыгі ў гэты дзень не спрыяе паляпшэньню іміджу Латвіі.
Шэсьце былых легіянэраў і латыскіх нацыяналістаў у Рызе 16 сакавіка расейская прапаганда выкарыстоўвае для пашырэньня дэзынфармацыі пра рост радыкальных і антырасейскіх настрояў у Латвіі і краінах Балтыі.