Бюджэтам Беларусі на 2019 год на ўтрыманьне 2 палат Нацыянальнага сходу прадугледжана 17 492 248 рублёў. Такую суму агучыла ў Фэйсбуку дэпутатка Ганна Канапацкая.
Такім чынам, агульныя выдаткі на парлямэнт складуць амаль дзьве тысячы рублёў штогадзінна, разам з выходнымі, сьвятамі і начным часам, адзначыла дэпутатка.
- 73% гэтай сумы расходуецца на Палату прадстаўнікоў (ніжняя палата парлямэнту з 110 дэпутатаў).
- 27% ідуць на ўтрыманьне Савету Рэспублікі (верхняя палата з 64 чалавек).
Акрамя выдаткаў на дэпутатаў Палаты прадстаўнікоў і чальцоў Савету Рэспублікі, сродкі выдзеленыя і на працу сакратарыятаў палат.
Таксама Канапацкая падлічыла, колькі заплянавана выдаткаваць на заробкі дэпутатаў і супрацоўнікаў парлямэнту:
- на заработную плату ўсіх дэпутатаў Палаты прадстаўнікоў — 4 867 170,6 рубля (556 рублёў за гадзіну).
- на супрацоўнікаў сакратарыяту Палаты — 3 244 780,4 рубля (370 рублёў за гадзіну).
- чальцам Савету Рэспублікі — 668 414 рублёў (пры гэтым чальцы Савету Рэспублікі могуць ажыцьцяўляць сваю дзейнасьць без адрыву ад асноўнай працы).
- супрацоўнікам сакратарыяту Савету Рэспублікі — 1 559 634 рублі (178 рублёў за гадзіну).
Акрамя гэтага, у бюджэце Беларусі на 2019 год прадугледжаныя іншыя выдаткі, зьвязаныя з працай Нацыянальнага сходу:
- Унёскі на сацыяльнае страхаваньне работнікаў і службоўцаў — 3 409 025 рублёў (389 рублёў на гадзіну).
- Набыцьцё прадметаў забесьпячэньня і расходных матэрыялаў — 58 539 рублёў (160 рублёў на дзень).
- Выправы і службовыя разьезды — 379 922 рублі (1040 рублёў на дзень).
- Іншыя бягучыя выдаткі на закупліваньне тавараў, аплату паслуг — 3 130 536 рублёў (357 рублёў на гадзіну).
- Выплата пэнсій, дапамог ды іншых трансфэртаў — 174 227 рублёў (477 рублёў на дзень).
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў