28 студзеня быў заблякаваны сайт «Белгазеты», выхад чарговага нумару «пад пытаньнем», піша БелаПАН.
Сайт закрылі «па тэхнічных прычынах»
Кірыл Жываловіч, які валодае 75% акцыяў выданьня, сказаў Свабодзе, што сайт «Белгазеты» закрылі «праз тэхнічныя праблемы». 29 студзеня www.belgazeta.by мусіць аднавіць працу.
Андрэй Бандарэнка, якога прызначылі дырэктарам выданьня на сходзе акцыянэраў 2 студзеня, у размове зь БелаПАН заявіў, што рэдакцыя ня мае доступу да сайта. Жываловіч кажа, што 28 студзеня рэдакцыя працавала ў звычайным рэжыме, ён і прызначаны ім дырэктар Юры Карэтнікаў былі на працы.
Жываловіч лічыць неправамерным прызначэньне Бандарэнкі на пасаду дырэктара, якую раней займаў ён сам. Раней Жываловіч называў гэта «рэйдэрскім захопам» выданьня.
А што з газэтай?
Наступны нумар «Белгазеты» мусіць выйсьці 29 студзеня.
Паводле слоў Бандарэнкі, уласьнік 25% акцый і галоўны рэдактар «Белгазеты» Ігар Высоцкі напісаў заяву на адпачынак і паведаміў, што «калектыў рэдакцыі не намераны ўдзельнічаць у выпуску наступнага нумару газэты». Высоцкі не пацьвердзіў і не аспрэчыў Свабодзе гэтую інфармацыю і сказаў зьвяртацца па камэнтары да Бандарэнкі.
Жываловіч гэтую інфармацыю не пацьвердзіў. Маўляў, газэту здалі ў друк і яна выйдзе ў час, а падпісанты электроннай вэрсіі ўжо атрымалі PDF-выпуск.
Дырэктар напісаў заяву на ўласьніка
«Мы прыйшлі да агульнай згоды, што для эфэктыўнай дзейнасьці газэты я застаюся дырэктарам, мы разам працягваем працаваць два месяцы і прыходзім да агульнага меркаваньня», — камэнтаваў Бандарэнка сустрэчу з Высоцкім і прадстаўніком Жываловіча Юрыем Карэтнікавым.
Бандарэнка падаў заяву пра «супрацьпраўную дзейнасьць Жываловіча» у аддзел па барацьбе з эканамічнымі злачынствамі УУС Ленінскага раёну Менску. У заяве ідзе гаворка пра вывад сродкаў з арганізацыі. Таксама Бандарэнка сказаў, што мае намер зьвяртацца ў пракуратуру.
Канфлікт у «Белгазеце». Што важна ведаць
- 21 студзеня «Белгазету» узначаліў праваабаронца Андрэй Бандарэнка, рашэньне прыняў сход уласьнікаў выданьня.
- Былы дырэктар «Белгазеты» Кірыл Жываловіч назваў сход неправамерным і абвінаваціў Бандарэнку ў «рэйдэрскім захопе» выданьня. 23 студзеня Жываловіч прызначыў дырэктарам Юрыя Карэтнікава, лідэра колішняга руху «Правы альянс».
- 75% акцый выданьня належаць журналісту Кірылу Жываловічу, 25% — заснавальніку Ігару Высоцкаму.
- «Белорусская газета» было зарэгістравана ў 1995 годзе былымі супрацоўнікамі «Белорусской деловой газеты», з 2005 году выходзіць пад назвай «БелГазета».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў