Лінкі ўнівэрсальнага доступу

На «Белавія» падалі ў расейскі суд 


Cамалёт авіякампаніі Белавія
Cамалёт авіякампаніі Белавія

Расейскае білетнае агенцтва «Синдбад», якое спыніла сваю дзейнасьць летам 2018 году, выставіла пазовы шэрагу авіякампаній на агульную суму блізу 450 мільёнаў расейскіх рублёў.

Пра гэта са спасылкай на картатэку Ханты-Мансійскага арбітражнага суду паведамляе газэта «Туризм и отдых».

У сьпісе пазваных 24 расейскія і замежныя авіяперавозчыкі, у тым ліку «Белавія», UTair, «Чэскія авіялініі» ды іншыя.

Раней былыя партнэры абвінавацілі сэрвіс у наўмысным дэмпінгу і вывадзе сродкаў за мяжу: паводле падлікаў, агенцтва вінаватае ім 10 мільёнаў даляраў. Не чакаючы наступстваў, «Синдбад» пайшоў у наступ, намагаючыся манэтызаваць паслугі пошуку, якімі ён забясьпечваў партнэрскія авіякампаніі. Падлікі пачынаюцца ад 2015 году.

Некаторыя пазовы ўжо прынятыя да разгляду і па іх прызначылі даты паседжаньняў.

«Калі па гэтых пазовах будуць прынятыя рашэньні, гэта стане прэцэдэнтам. У білетных агенцтваў няма камісій, яны працуюць на бонуснай аснове, якая залежыць ад аб’ёму продажаў. За паслугі эквайрынгу і мэтапошуку ніхто нікому ня плаціць. Авіякампаніі і так моцна пацярпелі ад „Синдбада“, наўрад ці яны ляяльна паставяцца да мільённых пазоваў», — на ўмовах ананімнасьці пракамэнтаваў экспэрт рынку.

Пазыцыя «Белавія»

Памеры пазоваў вагаюцца ад 1 мільёну 329 тысяч да 116 мільёнаў 298 тысяч расейскіх рублёў. Якую суму выставілі беларускаму перавозчыку, у офісе «Белавія» не ўдакладнілі.

«Такая гісторыя сапраўды мае месца, але пра суму пазову сказаць нічога не магу. Нашы юрысты з гэтым пытаньнем якраз разьбіраюцца. Суд у Ханты-Мансійску меўся пачацца акурат сёньня, а нейкія папярэднія вынікі будуць вядомыя ў лепшым выпадку заўтра», — паведаміла Свабодзе прадстаўніца кампаніі «Белавія» Настасься Навуменка.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG