Лінкі ўнівэрсальнага доступу

Танкеры, якія згарэлі ля берагоў Крыму, незаконна перавозілі газ у Сырыю, — украінскае міністэрства


Пажар на танкеры ля берагоў Крыму, 21 студзеня 2019 году

Два судны, на якіх ля берагоў Крыму адбыўся выбух і пажар, былі задзейнічаныя ў незаконнай перавозцы звадкаванага газу ў Сырыю, паведамляе Міністэрства ў пытаньнях часова акупаваных тэрыторый Украіны.

«Паводле дадзеных Офіса кантролю за замежнымі актывамі Міністэрства фінансаў ЗША (OFAC), судны Venice (Candy) і Maestro задзейнічаныя ў незаконных пастаўках газу ў Сырыю, пачынаючы з 2016 году», — гаворыцца ў паведамленьні.

У прэс-службе ўкраінскага міністэрства адзначаюць, што на згарэлых суднах не працавала сыстэма AIS (Automatic Identification System), каб пазьбегнуць адказнасьці з боку ўкраінскага заканадаўства і ня трапіць у сьпіс кампаній-парушальніц, да якіх могуць прымяняцца міжнародна-прававыя санкцыі.

«Расея заахвочвае масавыя адключэньні суднамі сыстэмы AIS, а прыведзены прыклад яшчэ раз дэманструе, як яна грэбуе нормамі міжнароднага права. На гэты раз аварыя прывяла да страшных наступстваў — сьмерці людзей», — адзначана ў паведамленьні.

У міністэрстве адзначылі, што сыстэма AIS дазваляе своечасова рэагаваць на аварыі суднаў і аказваць дапамогу пацярпелым, адсочваць парушэньні руху караблёў і незаконнае перасячэньне межаў.

Пры гэтым ва ўрадзе Ўкраіны сьцьвярджаюць, што танкеры, якія згарэлі, прыцягваліся да паставак газу, здабытага як з украінскага шэльфу, так і зь іншых краінаў. Названыя судны раней уваходзілі ў закрытыя парты анэксаванага Крыму.

21 студзеня ля берагоў Крыму адбыліся выбух і пажар на двух танкерах Venice (папярэдняя назва Candy) і Maestro, якія ішлі пад сьцягам Танзаніі.

На борце танкера Maestro знаходзіліся 14 чалавек — грамадзяне Турэччыны і Індыі, на борце танкера Candy — 17 чалавек, таксама грамадзяне Турэччыны і Індыі. Паводле ўкраінскага журналіста Андрэя Кліменкі, танкеры належаць турэцкай кампаніі Milenyum Denizcilik Gemi, якая знаходзіцца ў «сырыйскім санкцыйным сьпісе ЗША».

Паводле дадзеных СМІ, у выніку здарэньня загінулі ня менш за 14 чалавек, расейскае Фэдэральнае агенцтва марскога і рачнога транспарту паведамляе пра гібель 10 маракоў. Сьледчы камітэт Расеі па факце гібелі людзей завёў крымінальную справу паводле артыкулу «прычыненьне сьмерці празь неасьцярожнасьць дзьвюм і больш асобам».

З ліпеня 2014 году ўрад Украіны афіцыйна спыніў функцыянаваньне ўсіх партоў анэксаванага Расеяй паўвострава, гавані Крыму закрытыя для міжнароднага суднаходзтва.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG