Лінкі ўнівэрсальнага доступу

Тэрэза Мэй адхіліла ідэю другога рэфэрэндуму наконт Брэксыту


Тэрэза Мэй

Прэм’ер-міністарка Брытаніі Тэрэза Мэй, спрабуючы ўгаварыць палату абшчын вывесьці сытуацыю з Брэксытам з тупіку і прагаласаваць за праект дамовы аб выхадзе з Эўразьвязу, адхіліла заклікі правесьці другі рэфэрэндум наконт членства ў ЭЗ і нічога не сказала пра магчымасьць сваёй адстаўкі і пазачарговых выбараў, паведамляе расейская служба Бі-Бі-Сі.

У сваёй прамове ў панядзелак у парлямэнце Тэрэза Мэй двойчы паўтарыла, што прапанова аб другім рэфэрэндуме, на яе думку, не набірае большасьці ў Палаце абшчын, і самая рэалістычная магчымасьць пазьбегчы «абвальнага» выхаду з ЭЗ у канцы сакавіка — гэта прагаласаваць за дамову аб выхадзе, узгодненую яе ўрадам і ЭЗ.

У панядзелак прэм’ер-міністарка Брытаніі фармальна зноў унесла гэтую дамову на галасаваньне ў Палату абшчын. На мінулым тыдні парлямэнт рэкорднай большасьцю адхіліў гэты праект.

Фармальна парлямэнт абавязаў Мэй прапанаваць яму новы варыянт дамовы, але фактычна гэта немагчыма хоць бы таму, што Эўразьвяз неаднаразова і цьвёрда заяўляў, што не зьбіраецца пераглядаць гэты дакумэнт.

Новае галасаваньне па праекце пагадненьня аб выхадзе Брытаніі з ЭЗ прызначана на 29 студзеня. Тэрэза Мэй паабяцала, што ў астатнім часе будзе весьці перамовы з усімі партыямі, а затым з Брусэлем.

У прамове Тэрэзы Мэй, якая апісала розныя варыянты разьвіцьця сытуацыі, адсутнічаў адзін пункт: магчымасьць яе адстаўкі і пазачарговых выбараў пасьля другога (ці, магчыма, трэцяга) правалу дамовы з ЭЗ у Палаце абшчын.

Між тым гэты варыянт — з адначасовым пераносам фармальнага выхаду з ЭЗ — актыўна абмяркоўваецца і брытанскімі палітыкамі, і палітычнымі камэнтатарамі. Да адстаўкі Мэй і пазачарговых выбараў заклікае лідэр апазыцыйнай лейбарысцкай партыі Джэрэмі Корбін.

Перад гэтым галасаваньнем дэпутаты Палаты абшчын маюць намер разгледзець некалькі праектаў рашэньняў, сэнс якіх — адкласьці фармальны выхад з ЭЗ і перадаць кантроль над Брэксытам Палаце абшчын.

Адтэрміноўка, рэфэрэндум і яшчэ пяць варыянтаў

У адным з гэтых законапраектаў прапануецца адкласьці выхад з 29 сакавіка да канца гэтага году і надаць Палаце абшчын права загадваць ураду, што менавіта рабіць на перамовах з ЭЗ.

У двух іншых прапануецца правесьці новы рэфэрэндум аб членстве ў Эўразьвязе.

Аўтар яшчэ аднаго праекту прапануе правесьці сэрыю «індыкатыўных галасаваньняў» па сямі розных варыянтаў дзеяньняў — ад выхаду без пагадненьня да другога рэфэрэндуму — каб высьветліць, які з гэтых варыянтаў набірае хаця б адносную большасьць дэпутацкіх галасоў.

«На працягу наступных тыдня-двух тым або іншым с посабам будуць вывучаныя іншыя варыянты, і калі прэм’ер-міністарка адмовіцца пасунуць свае «чырвоныя лініі , то [...] парлямэнт паспрабуе ўзяць кантроль над працэсам у свае рукі», — сказаў у інтэрвію Бі-Бі-Сі ценявы міністар Брэксыту, лейбарыст Кір Стармэр.

«Да абвальнага выхаду не гатовыя»

Сам Стармэр выступае за другі рэфэрэндум і за тое, каб Брытанія засталася ў Эўразьвязе, але Лейбарысцкая партыя ў цэлым у асобе яе кіраўніцтва пакуль патрабуе ня новага рэфэрэндуму, а афіцыйнай адмовы ад выхаду з ЭЗ без пагадненьня.

«Да 29 сакавіка застаецца ўсяго 68 дзён, — сказаў у нядзелю Стармэр, — а мы зусім не гатовыя. Гэта будзе катастрофа».

На працягу другой паловы мінулага тыдня Тэрэза Мэй і члены яе кабінэту вялі перамовы з апазыцыйнымі партыямі, спрабуючы знайсьці якія-небудзь кампрамісы і ўсё ж сабраць большасьць за праект дамовы з ЭЗ.

Аднак, мяркуючы з выказваньняў апазыцыянэраў, якія ўдзельнічалі ў гэтых кансультацыях, жаданага Тэрэзай Мэй выніку яны не далі.

Лідэр лейбарыстаў Джэрэмі Корбін наогул не пайшоў на Даўнінг-стрыт. Ён запатрабаваў, каб да пачатку перамоваў зь ім прэм’ер-міністарка афіцыйна абавязалася не дапусьціць «абвальнага» выхаду з ЭЗ. Аднак Тэрэза Мэй адмаўляецца гэта рабіць.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG