Лінкі ўнівэрсальнага доступу

Ізраіль атакаваў іранскія вайсковыя аб’екты ў Сырыі


Танкі ізраільскай арміі на Галанскіх вышынях 20 студзеня 2019 году

Армія абароны Ізраілю заявіла, што нанесла ўдары па пазыцыях «Аль-Кудс» — элітнага падразьдзяленьня ў складзе іранскага Корпусу вартавых ісламскай рэвалюцыі — на тэрыторыі Сырыі.

Заява была апублікаваная пасьля таго, як ізраільскія сыстэмы супрацьракетнай абароны перахапілі ракету, выпушчаную па паўночнай частцы Галанскіх вышынь.

«Мы пачалі наносіць удары па іранскіх мэтах на тэрыторыі Сырыі», — гаворыцца ў заяве.

Вайскоўцы Ізраілю не далі дадатковай інфармацыі пра атаку. Паводле дадзеных Сырыйскага цэнтру маніторынгу правоў чалавека, ракетныя ўдары зафіксаваныя паблізу аэрапорта Дамаску і ў раёнах вакол сталіцы: ізраільскія ракеты зьнішчылі склады зброі і вайсковыя аб’екты, якія належаць Ірану, ёсьць ахвяры.

Дзяржаўнае тэлебачаньне Сырыі заявіла, што Ізраіль выпусьціў шэсьць ракет па раёне паблізу міжнароднага аэрапорта Дамаску, пяць зь якіх былі зьбітыя, а яшчэ адна трапіла ў раён сельскагаспадарчых угодзьдзяў, якія знаходзіліся побач.

У верасьні 2018 году агнём сырыйскай супрацьпаветранай абароны, якая адбівала ізраільскую атаку, быў зьбіты расейскі вайсковы самалёт Іл-20, загінулі 15 чалавек. Расея ўсклала адказнасьць за яго зьбіцьцё на Ізраіль і прыняла рашэньне аб пастаўках у Сырыю зэнітна-ракетных комплексаў С-300.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG