Менская міліцыя праводзіць праверку па факце траўмаваньня дзяўчыны, на якую з даху звалілася цагліна. Гэта пацьвердзіла БЕЛТА афіцыйны прадстаўнік ГУУС Менгарвыканкаму Натальля Ганусевіч.
«Кастрычніцкім РУУС цяпер праводзіцца праверка. Матэрыял праверкі зарэгістраваны... Чакаюць вынікі мэдычнай экспэртызы, паколькі дзяўчына зьвярнулася да мэдыкаў», — сказала Натальля Ганусевіч.
Свабода паведамляла, як 10 студзеня рабочыя чысьцілі дах дому № 5 на вуліцы Ленінградзкай у Менску. Разам са сьнегам на зямлю паляцелі будаўнічыя матэрыялы. Варвара Казлова ішла ўнізе, цагліна трапіла ёй у нагу. У яе гематома і зламаны палец. Варвара кажа, што дом, зь якога скідалі сьнег, ня быў агароджаны.
Пасьля гэтага яна зьвярнулася да мэдыкаў і напісала заяву ў міліцыю.