Польскія мытнікі на памежным пераходзе ў Баброўніках выявілі патроны, якія без дакумэнтаў перавозіў грамадзянін Беларусі. 25 боепрыпасаў калібру 8 мм спрабаваў нелегальна ўвезьці ў Польшчу 28-гадовы мужчына.
— Патроны знайшлі падчас дэталёвага агляду аўтамабіля, якім кіраваў беларус. Пакункі з газавымі патронамі ён схаваў у падлакотніку аўтамабіля. У мужчыны не было з сабою ніякіх дакумэнтаў, якія б дазвалялі яму ўвозіць боепрыпасы ў Польшчу, — паведамляе Мацей Чарнэцкі з прэс-групы Беластоцкай падатковай інспэкцыі.
У сувязі з парушэньнем беларускім грамадзянінам правілаў закону аб зброі і боепрыпасах справа была перададзеная польскай паліцыі. Беларусу пагражае штраф. Яго памер вызначыць суд.
