Лінкі ўнівэрсальнага доступу

Былы ізраільскі міністар адсядзіць 11 гадоў за шпіянаж на карысьць Ірана


Гонэн Сэгеў (у блакітнай кашулі).

Былы міністар энэргетыкі Ізраіля Гонэн Сэгеў прызнаў сябе вінаватым у шпіянажы на карысьць Ірана. Ён заключыў дасудовую зьдзелку са сьледзтвам, згодна зь якой будзе прысуджаны да 11 гадоў турэмнага зьняволеньня. Суд павінен зацьвердзіць гэта пагадненьне ў лютым, паведамляе newsru.co.il.

Па дадзеных сьледзтва, былы ізраільскі міністар быў завэрбаваны афіцэрам іранскай выведкі, які працаваў пад прыкрыцьцём у пасольстве Ірана ў Нігерыі, у 2012 годзе. Сэгеў у гэты час жыў у Нігерыі. Пасьля вярбоўкі палітык двойчы наведваў Іран, нягледзячы на тое, што грамадзян Ізраіля не пускаюць у гэту краіну.

Каб атрымаць інфармацыю, якая была цікавая куратарам у іранскай выведцы, Сэгеў падтрымліваў кантакты з ізраільцянамі, якія маюць дачыненьне да спэцслужбаў, абароны і дыпляматыі. Ніякіх важных дадзеных яму перадаць не ўдалося, сьцьвярджаюць спэцслужбы краіны.

  • Сэгеў быў абраны ў ізраільскі парлямэнт дэпутатам ад правай партыі «Цомэт» у 1992 годзе. У 1995 годзе ён стаў міністрам энэргетыкі і інфраструктуры ва ўрадзе Іцхака Рабіна.
  • У 2003 годзе Сэгеў зьняў у Ганконгу 20 387 шэкеляў са сваёй банкаўскай карткі і заявіў, што карта была скрадзеная. Яму пагражалі 3 месяцы турмы за махлярства. У 2004 годзе ён быў арыштаваны за спробу правезьці ў Ізраіль 32 тысячы таблетак экстазі. Былы міністар заявіў, што быў упэўнены, што вязе цукеркі M&M’s. Пры затрыманьні Сэгеў спрабаваў пазьбегнуць агляду з дапамогай перапісанага алоўкам дыпляматычнага пашпарта. У 2005 годзе ён быў асуджаны на 5 гадоў турмы, але адпушчаны на волю ў 2007 годзе.
  • Іран на афіцыйным узроўні не прызнае права на існаваньне Ізраіля як дзяржавы.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG