Лінкі ўнівэрсальнага доступу

Справа на 6 мільёнаў рублёў. Вынесьлі прысуд карупцыянэрам зь Мінабароны


Абвінавачаны Аляксандар Кулагін адзіны падчас суду быў у жалезнай клетцы

8 студзеня ў Фрунзенскім раённым судзе Менску абвясьцілі прысуд у гучнай справе карупцыянэраў зь Міністэрства абароны Беларусі і прадпрымальнікаў.

Паводле сьледзтва, у вайсковай установе шмат гадоў бралі хабар за спрыяньне літоўскай фірме «Аксамэда» ў пастаўках для Мінабароны па завышаных цэнах расейскага зімовага дызэльнага паліва. Сьледчыя ацанілі меркаваныя страты, нанесеныя ў выніку гэтых угодаў, у 6 мільёнаў рублёў.

Увечары 8 студзеня былі абвешчаныя прысуды.

  • Аляксандру Кулагіну, уласьніку фірмы «Аксамэда», — 8 гадоў калёніі ўзмоцненага рэжыму за махлярства і ўхіленьне ад падаткаў. У яго канфіскуюць маёмасьць — некалькі зямельных участкаў, пабудоваў і аўтамабіляў.
  • Алегу Хартановічу, кіраўніку фэрмэрскай гаспадаркі «Ігуменскае», — 8 гадоў калёніі ўзмоцненага рэжыму з канфіскацыяй маёмасьці. Яго прызналі вінаватым у хабарніцтве і махлярстве.
  • Барысу Лазерку, бізнэсоўцу, грамадзяніну Расейскай Фэдэрацыі, — 6 гадоў зьняволеньня з канфіскацыяй маёмасьці.
  • Аляксандру Пракаповічу, палкоўніку, былому працаўніку Міністэрства абароны, — 3 гады зьняволеньня з канфіскацыяй маёмасьці і пазбаўленьнем званьня палкоўніка.
  • Андрэю Нясмачнаму, падпалкоўніку, працаўніку ўпраўленьня паліва і змазачных матэрыялаў Мінабароны, — 6 гадоў зьняволеньня з канфіскацыяй маёмасьці і пазбаўленьнем званьня падпалкоўніка

З Кулагіна суд таксама пастанавіў спагнаць 5,9 мільёна рублёў салідарна з Хартановічам, а таксама больш за 4 мільёна рублёў разам з Хартановічам і Лазеркам у якасьці кампэнсацыі дзяржаве за нанесеныя страты.

У абвінавачаных канфіскавалі аўтамабілі, наяўныя грошы, каштоўныя манэты ды іншую маёмасьць.

Кулагін і Хартановіч сказалі, што будуць абскарджваць прысуд. Лазерка ня будзе.

«Нам краіну ратаваць трэба, а мы ўжо ня ведаем, як яшчэ камэрсантаў прыціснуць», — казаў Хартановіч.

Кулагін віну прызнаў часткова, іншыя абвінавачаныя віны ў хабарніцтве не прызналі, адвакаты прасілі для іх апраўдальных прысудаў. Алег Хартановіч заявіў у апошнім слове, што справа за махлярства супраць яго была сфабрыкаваная.

А абодва вайскоўцы віну ў хабарніцтве прызналі цалкам. Пракаповіч і Нясмачны ў апошнім слове прасілі суд не пазбаўляць іх волі, каб была магчымасьць кампэнсаваць нанесеныя страты.

Кулагін адзіны з абвінавачаных, хто быў пад вартай, астатнія — пад хатнім арыштам. Паводле сьледзтва, супрацоўнікі Мінабароны давалі бізнэсоўцам выгадную для іх інфармацыю пра патрэбы ў пастаўках паліва, закрывалі вочы на завышаныя цэны, спрыялі ў падпісаньні кантрактаў і за гэта рэгулярна атрымлівалі праз пасярэдніка хабар памерам ад 10 да 20 тысяч даляраў, — усяго на 85 тысяч даляраў. Фігуруюць у абвінавачаньні і артыкулы аб махлярстве і нявыплаце падаткаў.

Пракурор патрабаваў пакараць падсудных тэрмінамі ад 6 да 10 гадоў зьняволеньня з канфіскацыяй маёмасьці.

На працэсе, які цягнуўся больш за 3 месяцы, гучала імя яшчэ аднаго супрацоўніка Мінабароны, які, як мяркуецца, таксама браў хабар. Яшчэ да сьледзтва гэты афіцэр скончыў жыцьцё самагубствам.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG