Лінкі ўнівэрсальнага доступу

Улады ЗША панізілі статус прадстаўніцтва Эўразьвязу ў Вашынгтоне. Потым перадумалі


Ілюстрацыйнае фота. Прэзыдэнт ЗША Дональд Трамп на фоне сьцягу Эўразьвязу

Адміністрацыя прэзыдэнта Дональда Трампа панізіла дыпляматычны статус прадстаўніцтва Эўрапейскага зьвязу ў ЗША, афіцыйна не паведаміўшы пра гэта Брусэлю. Гэтую інфармацыю 8 студзеня пацьвердзіў Deutsche Welle прадстаўнік ЭЗ, падкрэсьліўшы, што гэты крок «ня быў добра ўспрыняты» кіраўніцтвам Эўразьвязу і што афіцыйны адказ Эўразьвязу на зроблены захад яшчэ абмяркоўваецца.

Пазьней 8 студзеня ананімныя крыніцы ў Эўразьвязе паведамілі брусэльскай студыі Deutsche Welle, што паніжэньне прадстаўніцтва ЭЗ было адмененае ў выніку двухбаковых перамоваў у сьнежні.

Паніжэньне рангу місіі (з дыпляматычнага статусу дзяржавы-чальца да ўзроўню міжнароднай арганізацыі), відаць, адбылося ў канцы кастрычніка — пачатку лістапада 2018 году, мяркуюць дыпляматы. Менавіта ў гэты пэрыяд супрацоўнікі прадстаўніцтва зьвярнулі ўвагу на тое, што кіраўнік місіі не атрымаў запрашэньня на шэраг падзеяў, якія праходзілі ў Вашынгтоне.

Пра фактычную зьмену статусу дыпляматы даведаліся пасьля звароту да арганізатараў пахаваньня былога прэзыдэнта ЗША Джорджа Буша-старэйшага ў сьнежні мінулага году.

У Дзярждэпартамэнце ЗША на запыт супрацоўнікаў місіі Эўразьвязу адказалі, што «забыліся паведаміць» ім, і патлумачылі, што «прынялі адпаведнае рашэньне, паколькі кіраўнік пратакольнай службы палічыў яго мэтазгодным». Паводле пратаколу, пра такія крокі трэба паведамляць загадзя і ў пісьмовым выглядзе.

На думку прадстаўніка адной з краін Эўразьвязу ў Вашынгтоне, «гаворка ідзе ня проста аб пратакольным пытаньні, у яго ёсьць відавочны палітычны матыў».

ЗША летась у сакавіку павялічылі мыты на сталь і алюміній з Эўропы, Канады і Мэксыкі. ЭЗ у адказ увёў штрафныя мыты на амэрыканскія тавары. У Эўрасаюзе пры гэтым заяўлялі пра гатоўнасьць да вырашэньня гандлёвага канфлікту, паколькі ён пагражае ўсёй сусьветнай эканоміцы.

Прадстаўніцтва Эўразьвязу ў Вашынгтоне дзейнічае ад 1965 году. Сёньня ў ім працуюць прыкладна 90 супрацоўнікаў, у тым ліку каля 30 эўрапейскіх дыпляматаў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG