Мужчына апублікаваў у сацсетках фатаздымак у форме супрацоўніка ДАІ з пнэўматычным пісталетам і кайданкамі ў руках.
Жыхару Полацка 1989 году нараджэньня прысудзілі штраф у 5 базавых велічыняў (122,5 рублі) за фотаздымак у форме супрацоўніка ДАІ зь пісталетам у руках, які той выклаў у адной зь сацыяльных сетак.
Пра гэта гарадзкому парталу gorod214.by паведаміла афіцыйны прадстаўнік УУС Віцебскага аблвыканкаму Вольга Шкуратава.
«Рашэньне суду ўступіла ў законную сілу 29 сьнежня 2018 года. У ходзе праверкі таксама ўстаноўлена, што для здымка, разьмешчанага ў сацыяльнай сетцы, выкарыстана пнэўматычная зброя», — удакладніла Шкуратава.
На 29 сьнежня мінулага году базавая велічыня складала 24,5 рублёў. Фатаздымак, дзе палачанін пазіруе ў форме супрацоўніка ДАІ са зброяй і кайданкамі ў руках, зьявіўся ў сацыяльных сетках 28 лістапада.