Вярхоўны кіраўнік Паўночнай Карэі Кім Чэн Ын у лісьце да прэзыдэнта Паўднёвай Карэі Мун Чжэ Іна заклікаў да новых перамоваў паміж Поўначчу і Поўднем на працягу наступнага году.
Як паведамілі пра зьмест ліста ў апараце паўднёвакарэйскага кіраўніка, Кім таксама выказаў у ім жаль, што ня змог ажыцьцявіць плянаваны візыт у Сэул да канца гэтага году.
На працягу гэтага году Кім і Мун сустракаліся тройчы. Апошнім часам Пхэньян надае больш увагі дыпляматыі пасьля шэрагу ядзерных і ракетных выпрабаваньняў, якія рэзка асудзілі Сэул, а таксама Захад і рэшта міжнароднай супольнасьці.
Таксама сёлета паўночнакарэйскі кіраўнік меў саміт з прэзыдэнтам ЗША Дональдам Трампам, які назвалі гістарычным — хоць ён практычна ня даў рэальных вынікаў: перамовы аб ядзерным раззбраеньні Паўночнай Карэі, якія пачаліся пасьля саміту, хутка зайшлі ў глухі кут — Пхэньян выставіў Вашынгтону патрабаваньне спачатку зьняць з яго ўсе санкцыі; у ЗША настойваюць, што зьняцьце санкцыяў можа быць толькі пасьля таго, як Паўночная Карэя ажыцьцявіць абяцанае на словах ядзернае раззбраеньне.