Лінкі ўнівэрсальнага доступу

Трамп усклаў на дэмакратаў адказнасьць за сьмерць дзяцей мігрантаў


Памінальная служба ў Гватэмале па нябожчыцы дзяўчынцы

Прэзыдэнт ЗША Дональд Трамп усклаў на сваіх апанэнтаў — дэмакратаў у Кангрэсе — адказнасьць за сьмерць дзяцей імігрантаў, затрыманых на мяжы ЗША. Як напісаў Трамп ў твітэры, дэмакраты сваёй адмовай зрабіць больш жорсткім іміграцыйную палітыку і, у прыватнасьці, вылучыць сродкі на будаўніцтва памежнай сьцяны патураюць нелегальнай іміграцыі.

«Калі б існавала сьцяна, яны нават не спрабавалі б патрапіць у ЗША», — напісаў Трамп пра імігрантаў. Ён адзначыў, што двое дзяцей, якія памерлі нядаўна, былі сур’ёзна хворыя і віны памежнай паліцыі ў іх сьмерці няма.

У сьнежні ў ЗША памерлі двое дзяцей з Гватэмалы, якія разам з бацькамі раней былі затрыманыя за незаконнае перасячэньне мяжы і ўтрымліваліся ў спэцпрыёмніку. Расьсьледаваньне прычын іх сьмерці працягваецца.

Розьніца ў поглядах на праблемы міграцыі і на будаўніцтва сьцяны на мяжы з Мэксыкай пакуль не дазваляе дэмакратам і рэспубліканцам прыйсьці да згоды аб фінансаваньні фэдэральнага ўраду, з-за чаго ўжо больш за тыдзень доўжыцца так званы «шатдаўн» — частка міністэрстваў і ведамстваў пазбаўленыя фінансаваньня.

Праект бюджэту прадугледжвае вылучэньне дадатковых сродкаў на збудаваньне сьцяны, аднак дэмакраты адмаўляюцца за яго галасаваць, сьцьвярджаючы, што праблему міграцыі нельга вырашыць паліцэйскімі захадамі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG