Кіроўца грузавіка зьбіў пешахода на трасе Р20 пад Полацкам і зьехаў, паведамілі БелТА ва УДАІ УУС Віцебскага аблвыканкама. Сьмяротная аварыя здарылася ноччу 21 сьнежня на 61-м кілямэтры аўтадарогі Віцебск — Полацк.
«Нявызначаны кіроўца вялікагрузу ехаў меркавана з боку Полацку ў напрамку Віцебску. Ён наехаў на пешахода, які знаходзіўся на праезнай частцы. У выніку ДТЗ 38-гадовы жыхар Наваполацка памёр на месцы здарэньня», — паінфармавалі ў ДАІ.
Кіроўца абвешчаны ў вышук.
Падобнае ДТЗ здарылася ўжо раніцай 22 сьнежня і пад Бягомлем.
«Кіроўца аўтацягніка „Мэрсэдэс-Бэнц Атэга“ зьбіў 40-гадовага жыхара вёскі Ўлесьсе, які выйшаў на дарогу. Мужчына атрымаў шматлікія пераломы і пашкоджаньні ўнутраных органаў, быў дастаўлены ў рэанімацыю. Ён памёр праз некалькі гадзін», — паведамілі ў ДАІ.
Абодва пешаходы знаходзіліся на праезнай частцы ў цёмны час бязь флікераў.
