Польшча чакае рашэньня швэдзкага суда ў дачыненьні да польскага судзьдзі часоў сталінізму Стэфана Міхніка. Ён абвінавачваецца ў вынясеньні незаконных сьмяротных прысудаў і пазбаўленьні волі людзей у эпоху сталінізму, паведамляе Польскае радыё.
Пракурор Інстытута нацыянальнай памяці Польшчы Робэрт Яніцкі паведаміў, што падазраваны выкарыстоўвае факт, што ён жыве за межамі Польшчы, каб перашкодзіць расьсьледаваньню:
«Суд устанавіў, што падазраваны хаваецца ад польскіх праваахоўных органаў. Уладам Каралеўства Швэцыя перададзены эўрапейскі ордэр на арышт (Міхніка). І мы чакаем рашэньня адпаведнага суда Каралеўства Швэцыя».
Камісія па расьсьледаваньні злачынстваў супраць польскай нацыі праводзіць расьсьледаваньне ў дачыненьні да былога судзьдзі Ваеннага акруговага суда ў Варшаве Стэфана Міхніка. Ён абвінавачваецца ў вынясеньні незаконных сьмяротных прысудаў і пазбаўленьні волі людзей у эпоху сталінізму.
Падазраваны пазьбягае польскіх праваахоўных органаў і кантактаў з пракуратурай і дыпляматычным прадстаўніцтвам Польшчы ў Швэцыі. Ён таксама спыніў атрымліваць судовую карэспандэнцыю па сваёй справе.
89-гадовы Стэфан Міхнік жыве ў Швэцыі з 1968 года. Ён зьяўляецца зводным братам Адама Міхніка, заснавальніка і галоўнага рэдактара выданьня Gazeta Wyborcza.
