Сьледча-апэратыўная група працуе ў адной са школ Клічава па факце паведамленьня пра выбух.
Як піша Сьледчы камітэт, каля 15:30 у кляс, дзе праходзіў факультатыў, «зайшоў 32-гадовы мясцовы жыхар у стане алькагольнага ап’яненьня і паведаміў, што зараз адбудзецца выбух».
Мужчыну затрымаў і перадаў супрацоўнікам міліцыі настаўнік, які праходзіў па калідоры і пачуў пагрозу.
Спраўджваючы паведамленьне затрыманага, эвакуавалі 48 дзяцей и 22 супрацоўнікаў школы. Ніхто не пацярпеў.
За заведама ілжывае паведамленьне пра падрыхтоўку выбуху завялі крымінальную справу. Паводле ч. 1 арт. 340 КК Беларусі такое злачынства караецца:
- штрафам;
- арыштам;
- да 3 гадоў абмежаваньня волі;
- да 5 гадоў турмы.
