За год Беларусь перайшла з 23-га на 29-е месца ў штогадовым рэйтынгу Climate Change Performance Index.
Нямецкія арганізацыі NewClimate Institute, Germanwatch і Climate Action Network апублікавалі рэйтынг краін паводле высілкаў, якія тыя прыкладаюць, каб спыніць зьмены клімату. Згодна з высновамі навукоўцаў, Беларусь заняла ў рэйтынгу 29-ю пазыцыю, у леташнім рэйтынгу займала 23-ю.
Пры складаньні рэйтынгу ўлічваюцца ўзроўні выкіду парніковых газаў, разьвіцьця ўзнаўляльнай энэргетыкі, спажываньня электраэнэргіі і агульная палітыка ў сфэры захоўваньня клімату.
Кожнай краіне выстаўляецца ацэнка, максымальная — 100 балаў. Беларусі навукоўцы паставілі 53,3 бала, летась было 56,3.
Самымі экалягічнымі ў рэйтынгу сталі Швэцыя, Марока і Літва, замыкаюць рэйтынг Саудаўская Арабія, ЗША і Іран.
У складзеным рэйтынгу з 57 краін Беларусь займае сярэднюю пазыцыю: па суседзтве зьверху Нідэрлянды і Нямеччына, зьнізу — Грэцыя і Бэльгія.
Украіна за год зьмяніла паказьнікі ў рэйтынгу экалягічнасьці і змагла заняць 18-е месца.
