Лідэры ЗША, Мэксыкі і Канады падпісалі ў Буэнас-Айрэсе, дзе праходзіць саміт «Вялікай дваццаткі», новае пагадненьне аб свабодным гандлі паміж трыма краінамі.
Яно прыйдзе на зьмену Паўночнаамэрыканскаму пагадненьню аб свабодным гандлі (NAFTA), замена якога была адным з перадвыбарчых абяцаньняў Дональда Трампа.
Выступаючы на цырымоніі падпісаньня дамовы, Трамп падкрэсьліў, што яна зьяўляецца справядліваю для ўсіх трох краін, асабліва адзначыўшы меры па абароне інтэлектуальнай уласнасьці і працаўнікоў сельскай гаспадаркі.
Прэм’ер-міністар Канады Джастын Трудо заявіў, што новая дамова будзе выгадная для сярэдняй клясы і будзе працаваць на людзей.
У цырымоніі ўдзельнічаў і прэзыдэнт Мэксыкі Энрыке Пэнья Ньета — у апошні дзень свайго знаходжаньня на пасадзе.
Перамовы пра новае пагадненьне не абышліся бязь цяжкасьцяў, спачатку ЗША дасягнулі паразуменьня з Мэксыкай і толькі потым — з Канадай.
На саміце G20 чакаюцца перамовы Трампа са старшынёй КНР Сі Цзіньпінам пра пераадоленьне глыбокіх разыходжаньняў у сфэры гандлю.