У Менску праходзіць форум «Унівэрсальнае асяродзьдзе», галоўная мэта якога — зрабіць сьвет больш даступным. На ім можна атрымаць кансультацыю ад арганізацый, якія працуюць з тэмай інваліднасьці, пазнаёміцца з апошнімі тэхнічнымі сродкамі і дакрануцца да партрэта Пуціна.
Расейская кампанія «Тифлоцентр „Вертикаль“» займаецца вырабам тавараў для людзей з рознымі формамі інваліднасьці. У тым ліку партрэтаў вядомых асобаў для невідушчых. На форум у Менск яны прывезьлі партрэт расейскага кіраўніка Ўладзіміра Пуціна.
«Мы проста схапілі першы партрэт, які трапіўся пад руку, — прызналіся супрацоўнікі кампаніі. — У нас іх вельмі шмат — каго невідушчыя людзі замовяць, таго і робім».
На стэндзе кампаніі «Орто-Космос» выстаўлены расейскі сьцяг, які ў 2012 годзе падпісаў Пуцін. Свой учынак кампанія тлумачыць проста: «Мы расейская кампанія, таму і на нашым стэндзе расейскі сьцяг».
Форум будзе працаваць з 29 лістапада па 1 сьнежня ў выставачным павільёне на праспэкце Пераможцаў.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў