Футбольны клюб «НФК Крумкачы», які па выніках сэзону ў другой лізе чэмпіянату Беларусі атрымаў права гуляць у першым дывізіёне, сутыкнуўся з чарговымі складанасьцямі.
Сёлета рашэньнем Беларускай фэдэрацыі футболу (БФФ) «Крумкачы» былі дыскваліфікаваныя з вышэйшай лігі: менскай камандзе адмовілі ў ліцэнзіі за «сыстэматычныя парушэньні» патрабаваньняў рэглямэнту — парушэньне тэрмінаў падачы дакумэнтаў і зрыў працэсу ліцэнзаваньня.
У «Крумкачоў» зьмяніліся заснавальнікі, каманда заявілася ў другую лігу, заняла па выніках сэзону другое месца і атрымала падвышэньне ў рангу. Але легалізавацца ў першай лізе, дзе патрабаваньні рэглямэнту больш жорсткія, чым у аматарскім футболе, аказалася ня так проста: клюб з такой назвай ужо існуе, рэгістраваць новы фэдэрацыя не зьбіраецца.
Фэдэрацыя футболу: сярод чальцоў асацыяцыі «Крумкачы» ужо ёсьць
19 сакавіка арбітраж БФФ канчаткова адхіліў заяву футбольнага клюбу «Крумкачы» наконт рашэньня камітэту клюбнага ліцэнзаваньня. Такім чынам, каманда страціла месца ў эліце і магла заявіцца толькі ў другую лігу ўнутранага чэмпіянату. Тады ў звароце да заўзятараў «Крумкачы» адзначылі, што іх «прысудзілі да найвышэйшай меры», хоць калектыў быў гатовы да чэмпіянату-2018 як кадрава, так і фінансава.
30 сакавіка Беларуская фэдэрацыя футболу задаволіла заяўку «НФК Крумкачы» на ўдзел у першынстве другой лігі чэмпіянату Беларусі.
Адным з заснавальнікаў абноўленых «Крумкачоў» стаў вядомы піяніст і футбольны заўзятар Юры Бліноў. Па выніках першынства каманда заняла другое месца і атрымала права на падвышэньне ў рангу.
Аднак, як пацьвердзіў Свабодзе дырэктар дэпартамэнту ліцэнзаваньня БФФ Андрэй Мішаеў, у працэсе атрыманьня ліцэнзіі на выступленьне ў першай лізе ўзьніклі праблемы з назвай.
«Справа ў тым, што сярод чальцоў асацыяцыі ўжо ёсьць футбольны клюб з назвай „Крумкачы“ — той, дзе сярод заснавальнікаў Дзяніс Шунто (былы кіраўнік і заснавальнік „Крумкачоў“. — РС), — патлумачыў спартовы чыноўнік. — Адпаведна, ня можа зьявіцца яшчэ адна каманда з аналягічным найменьнем. Таму мусім абмеркаваць пытаньне зь юрыдычнай службай, каб вызначыцца з канчатковай пазыцыяй».
Сам Дзяніс Шунто сьцьвярджае, што ня мае дачыненьня да абноўленай каманды, проста даў дазвол на выкарыстаньне назвы на час выступаў у другой лізе. Як цяпер вырашаць юрыдычную калізію, ён адказаць ня здолеў.
Дырэктарат «Крумкачоў»: працуем найперш над тым, каб захаваць назву
Дырэктар «НФК Крумкачы» Алег Давідовіч адзначае, што захаваньне назвы каманды — момант прынцыповы. Брэнд «Крумкачы» стаў знакавай зьявай у беларускім спорце, пра што сьведчыць і заўзятарская адданасьць: матчы з удзелам каманды ў другой лізе зьбіралі больш гледачоў, чым асобныя гульні прадстаўнікоў эліты.
«Пакуль усё ў падвешаным стане, — гаворыць ён. — Гэта ня столькі прэтэнзіі, такія патрабаваньні рэглямэнту. Справа ў тым, што другая ліга аматарская, а ўжо ў першым дывізыёне клюб мусіць уступіць у асацыяцыю Беларускай фэдэрацыі футболу. Адпаведна, трэба выканаць шэраг правілаў. Пакуль абмяркоўваем пытаньні ў штатным рэжыме. Працуем найперш над тым, каб захаваць назву. Шукаем агульныя падыходы, каб і фэдэрацыі было добра, і нашым заўзятарам».
«Крумкачы»: гісторыя ўзьлёту і падзеньня
Футбольны клюб «Крумкачы» заснаваны 20 сакавіка 2014 году. Каманда пасьлядоўна прайшлі ўсе прыступкі — аматарскую другую лігу, паўпрафэсійную першую, а ў 2016-м ужо праводзілі дэбютны сэзон у кампаніі наймацнейшых удзельнікаў чэмпіянату Беларусі. Аднак неўзабаве паўсталі фінансавыя праблемы: «Крумкачы» аказаліся адзінымі ў элітным дывізіёне, хто ня меў дзяржаўнай падтрымкі. За імі не было ні гарадзкіх адміністрацый, ні буйных прадпрыемстваў. Дапамогі тытульных спонсараў не хапала.
Сэзон-2017 зноў пачаўся з абмеркаваньня фінансавага становішча. Пазычаныя ў БАТЭ 150 тысяч даляраў трэба было вяртаць, але зрабіць гэта ў агавораны тэрмін не ўдалося. Эканамічны суд Менску вынес рашэньне спагнаць грошы ў загадным парадку. Пачалі набірацца даўгі па заробках гульцам і трэнэрам. Летась увосень праз краўдфандынг удалося сабраць блізу 30 тысяч рублёў — чвэрць ад сумы, патрэбнай, каб скончыць першынства.
На пачатку гэтага году паведамлялася, што клюб не ўратуе ўжо нішто. У гэты момант знайшоўся армянскі інвэстар, які пагадзіўся ўкласьці амаль 600 тысяч даляраў, а таксама вырашыць праблему з даўгамі — пры ўмове, што каманда будзе гуляць у вышэйшай лізе.
Аднак Беларуская фэдэрацыя футболу адмовіла «Крумкачам» у ліцэнзаваньні, усе апэляцыі засталіся незадаволеныя. Заснавальнікі апынуліся перад дылемай — або самаліквідавацца, або заявіцца ў другую лігу і пачаць з чыстага аркуша.
Зь першай жа спробы абноўленай камандзе ўдалося ўзьняцца да першага дывізіёну, але наступствы «клянаваньня», відавочна, пры гэтым улічаныя не былі.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў