Раней знакі ў гонар гэтага спэцпадразьдзяленьня міліцыі зьявіліся ў Магілёве і Віцебску.
Памятны знак АМАПу плянуюць устанавіць у менскім мікрараёне Уручча. Каменная стэла з надпісам «Законнасьць, гонар, адвага» мусіць зьявіцца ўжо ў сакавіку, паведамляюць «Менск-Навіны». Кампазыцыю завяршае беркут, гэта сымбаль Атраду міліцыі асаблівага прызначэньня.
Над знакам працуе заслужаны мастак Дагестану скульптар Хізры Азадулаеў.
Гэта будзе ўжо трэці падобны помнік у Беларусі. Першы быў пастаўлены ў гонар 100-годдзя міліцыі ў Віцебску. Яшчэ адзін стаіць у Магілёве: на стэле шыльда з надпісам па-беларуску: «Законнасьць, гонар, адвага», а зьверху таксама беркут. Памятны знак стварыў віцебскі скульптар Сяргей Сотнікаў.
Знакі ў Магілёве і Віцебску паставілі ў гонар 30-годзьдзя стварэньня падразьдзяленьняў АМАПу.
Атрады АМАП былі заснаваныя ў канцы існаваньня СССР, калі пачалі праходзіць масавыя акцыі грамадзян. У Менску гэтыя падразьдзяленьні існуюць з 1998 году. Яны вядомыя сваім удзелам у разгоне апазыцыйных акцый.
Камандзіры Менскага АМАПу і Ўнутраных войскаў МУС былі пад санкцыямі Эўразьвязу і ЗША за жорсткасьць падчас разгону акцыяў апазыцыі.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў