Беларусь і Азэрбайджан рыхтуюць кантракт на пастаўку чарговай партыі беларускай вайсковай тэхнікі. Пра гэта паведаміў прэзыдэнт Азэрбайджану Ільхам Аліеў па выніках перагавораў з кіраўніком Беларусі Аляксандрам Лукашэнкам.
Як паведамляе БелТА, сёньня па выніках перамоваў быў падпісаны мэмарандум аб узаемаразуменьні паміж дзяржаўным вайскова-прамысловым камітэтам Беларусі і міністэрствам абароны Азэрбайджану аб разьвіцьці ўзаемавыгаднага двухбаковага супрацоўніцтва ў галіне паставак узбраеньня і тэхнікі супрацьпаветранай абароны.
«У самы кароткі час ён будзе трансфармаваны ў кантракт для набыцьця чарговай партыі вайсковай тэхнікі з Беларусі» — распавёў Аліеў. Паводле яго Азэрбайджан задаволены ўзаемадзеяньнем з Беларусьсю ў гэтай сфэры, таму што яе прадукцыя вельмі якасная і эфэктыўная.
«Таму невыпадкова, што вайскова-тэхнічнае супрацоўніцтва паміж нашымі краінамі мае ўжо добрую гісторыю, дастаткова вялікія аб’ёмы і добрую тэндэнцыю да пашырэньня» — заявіў кіраўнік Азэрбайджану.