Лінкі ўнівэрсальнага доступу

Новы вырак за экстрэмізм: жыхара Івацэвічаў аштрафавалі за перапосты пра акцыі анархістаў і «дармаедаў»


Уладзіслаў Серада
Уладзіслаў Серада

Жыхара гораду Івацэвічы Берасьцейскай вобласьці Ўладзіслава Сераду аштрафавалі на 367,5 рубля (15 базавых велічынь) за перапост у сацыяльнай сетцы «ЎКантакце» інфармацыі пра акцыі анархістаў і «дармаедаў».

Такое рашэньне прыняў суд Кастрычніцкага раёну Горадні 16 кастрычніка.

Суд прызнаў Сераду вінаватым у распаўсюдзе экстрэмісцкіх матэрыялаў (артыкул 17.11 Кодэксу аб адміністрацыйных правапарушэньнях Беларусі).

Згодна з пастановай суду, ён разьмясьціў тры забароненыя матэрыялы ў сацыяльнай сетцы «ЎКантакце» летась увесну і ўлетку. Перапосты зь розных інфармацыйных рэсурсаў тычыліся акцый расейскіх анархістаў у падтрымку беларускіх, а таксама акцый супраць «дэкрэту аб дармаедах».

Уладзіслаў Серада прызнаў, што сапраўды разьмясьціў на сваёй старонцы ў сацыяльнай сетцы гэтую інфармацыю. Аднак ён ня ведаў, што інфармацыя можа лічыцца экстрэмісцкай. Высьветлілася, што два апублікаваныя Серадой матэрыялы трапілі ў забаронены сьпіс ужо пасьля таго, як ён іх перапосьціў, а рэсурс, на якім знаходзіўся трэці матэрыял, ня быў заблякаваны.

Сваю віну ва ўчыненьні адміністрацыйнага правапарушэньня Серада не прызнаў.

Малады чалавек цяпер адбывае «хімію» ў Горадні за іншую справу. Яму засталося паўтара месяца да вызваленьня.

2 лістапада суд Кастрычніцкага раёну Горадні аштрафаваў на 612,5 рубля за «экстрэмізм» горадзенскага музыканта і журналіста Алеся Дзянісава.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG