68-гадовы японскі міністар Ёсітака Сакурада, які адказвае за кібэрбясьпеку, прызнаўся, што ніколі не карыстаўся кампутарамі ў сваім прафэсійным жыцьці.
Пра гэта ён распавёў на сустрэчы з дэпутатамі японскага парлямэнту, паведамляе Kyodo News. Сукарада заявіў, што з 25 гадоў ён толькі выдае інструкцыі сваім памочнікам і сакратарам.
«Я ніколі ў сваім жыцьці не выкарыстоўваў кампутар», — сказаў міністар.
Адзін з дэпутатаў спытаў Сакураду, ці выкарыстоўваюцца на японскіх атамных электрастанцыях USB-назапашвальнікі. Міністар ня змог адказаць на гэтае пытаньне, заявіўшы, што на яго здольныя адказаць «спэцыялісты», распавядае Gizmodo са спасылкай на японскі тэлеканал FNN Prime.
Заява Сакурады выклікала крытыку з-за ягонай пасады, піша Kyodo News. Тым ня менш, сам чыноўнік упэўнены, што спраўляецца са сваёй працай.
Ёсітака Сакурада цяпер зьяўляецца намесьнікам кіраўніка ўпраўленьня японскага ўраду па кібэрстратэгіі і міністар па правядзеньні Алімпійскіх гульняў у Токіё ў 2020 годзе.
Ён заняў сваю пасаду ў мінулым месяцы пасьля пераабраньня прэм’ер-міністра Сіндзо Абэ кіраўніком кіроўнай у Японіі Лібэральна-дэмакратычнай партыі.
