Па дадзеных паліцыі, раніцай 15 лістапада двое невядомых кінулі дзьве бутэлькі з запальнай вадкасьцю ў дзьверы Андрэеўскай царквы і выкарыстоўвалі газавыя балёнчыкі супраць ахоўнікаў храма.
«У выніку здарэньня ніхто не пацярпеў. Узгараньня не адбылося», — заявіла паліцыя Кіева.
Ахоўнікі распавялі, што спрабавалі затрымаць невядомых, але яны ўжылі газавыя балёнчыкі і схаваліся.
Як паведаміла паліцыя ў Facebook, справы распачалі па артыкулах «замах на наўмыснае зьнішчэньне або пашкоджаньне маёмасьці» і «парушэньне раўнапраўя грамадзян у залежнасьці ад іх расавай, нацыянальнай прыналежнасьці, рэлігійных перакананьняў, інваліднасьці і па іншых прыкметах».
За ўчыненьне правапарушэньняў зламысьнікам пагражае да дзесяці гадоў пазбаўленьня волі, дадалі ў паліцыі.
Па словах праваахоўнікаў, пры аглядзе работнікі сталічнай паліцыі выявілі ў царкве заплечнік, які, верагодна, належыць правапарушальнікам.