Прэзыдэнт Украіны Пятро Парашэнка вечарам 13 лістапада правёў сустрэчу з часткай герархаў Украінскай праваслаўнай царквы Маскоўскага патрыярхату.
Як паведамляе карэспандэнт Бі-Бі-Сі, сустрэча праходзіла ў закрытым рэжыме.
На мерапрыемстве прысутнічала некалькі архірэяў УПЦ МП, у тым ліку мітрапаліт Пераяслаў-Хмяльніцкі Аляксандр, аднак дакладная колькасьць удзельнікаў сустрэчы невядомая.
Дырэктар Нацыянальнага інстытута стратэгічных дасьледаваньняў Расьціслаў Паўленка паведаміў журналістам, што на сустрэчы былі тыя, хто плянуе ўдзельнічаць у аб’яднальным саборы па стварэньні Ўкраінскай праваслаўнай царквы.
Паводле Паўленкі, на сустрэчы прэзыдэнт расказаў пра свае перамовы з Сусьветным патрыярхам, а прадстаўнікі УПЦ МП выказалі падтрымку працэсу атрыманьня аўтакефаліі царквы ва Ўкраіне.
«Дастаткова вялікая частка япіскапату Ўкраінскай праваслаўнай царквы Маскоўскага патрыярхату выступае за стварэньне адзінай Памеснай праваслаўнай царквы», — сказаў Паўленка.
Тым часам раней 13 лістапада Ўкраінская праваслаўная царква Маскоўскага патрыярхату прыняла пастанову, у якой адмаўляецца ўдзельнічаць у працэсе стварэньня аўтакефальнай Украінскай праваслаўнай царквы.
«Сабор япіскупаў адзначае, што працэс прадстаўленьня так званага томасу аб аўтакефаліі зьяўляецца штучным, навязаным звонку», — гаворыцца ў дакумэнце.
У сярэдзіне кастрычніка Руская праваслаўная царква разарвала адносіны з Сусьветным Канстантынопальскім патрыярхатам. Прычынай канфлікту было рашэньне Канстантынопалю адмяніць указ 1686 году, паводле якога Ўкраінская праваслаўная царква перайшла пад кантроль Маскоўскага патрыярхату.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў