Шасьцёра палестынцаў і адзін ізраільскі вайсковец загінулі ў выніку рэйду арміі абароны Ізраілю на поўдні сэктару Газы.
Выданьне The Jerusalem Post удакладняе, што сярод загінулых палестынцаў — адзін з ключавых камандзіраў ісламісцкай групоўкі «Хамас». Дэталі апэрацыі не раскрываюцца.
У адказ на дзеяньні ізраільскіх вайскоўцаў палестынцы нанесьлі ракетныя ўдары па Ізраілі. Тры ракеты перахапіла сыстэма супрацьракетнай абароны «Жалезны купал».
З прычыны абвастрэньня становішча на мяжы з Газай прэм’ер-міністар Ізраілю Біньямін Нэтаньягу перапыніў свой візыт у Францыю, дзе браў удзел ва ўрачыстасьцях з нагоды стагодзьдзя заканчэньня Першай усясьветнай вайны.
