Сёньня ў Парыжы праходзяць урачыстасьці з нагоды стагодзьдзя з дня заканчэньня Першай сусьветнай вайны. У іх удзельнічаюць лідэры больш чым трох дзясяткаў краін, чые салдаты знаходзіліся сто гадоў таму па розныя бакі лініі фронту.
Афіцыйна страляць на франтах І усясьветнай вайны перасталі ў 11 гадзін раніцы 11-га чысла 11-га месяца 1918 года. Такая была дамоўленасьць, дасягнутая некалькімі гадзінамі раней у чыгуначным вагоне пад Парыжам.
Салён-вагон належаў францускаму маршалу Фэрдынанду Фошу, галоўнакамандуючаму войскамі дзяржаў Антанты на Заходнім фронце. Першая сусьветная вайна, якую ўжо тады называлі «Вялікай», скончылася.