Брусэль адхіліў ключавую прапанова па Брэксыце прэмʼер-міністра Вялікабрытаніі Тэрэзы Мэй, піша The Times. Мэй прапаноўвала стварыць «незалежны мэханізм» для пераадоленьня мытных праблем пры выхадзе краіны з Эўразьвязу. Улады ЭЗ, аднак, настойваюць на тым, каб вырашаць рознагалосьсі выключна ў Эўрапейскім судзе.
Па дадзеных выданьня, чатыры брытанскіх міністры, якія выступаюць супраць Брэксыта, маюць намер падаць у адстаўку. Гэта ўскладніць працэс перамоваў для Мэй, якая спадзявалася выступіць на іх з абʼяднаным кабінэтам. Зь іншага боку, супраць пляну Мэй гатовыя галасаваць і эўраскептыкі ў парлямэнце краіны, незадаволеныя «мяккім» варыянтам Брэксыта. Пра гэта паведамляе Telegraph.
Раней СМІ распавядалі, што Мэй пераканала Брусэль дазволіць Злучанаму Каралеўству застацца ў Мытным саюзе ЭЗ з захаваньнем права выхаду зь яго, а таксама частковага кантролю за таварамі, што трапляюць з-за мяжы.
Афіцыйным днём Брэксыта зьяўляецца 29 сакавіка 2019 года. Пасьля гэтага пачнецца так званы «пераходны пэрыяд», які працягнецца да 2021 года.
Камэнтаваць тут можна праз Facebook. Нам таксама можна напісаць на адрас radiosvaboda@gmail.com