Экстрэмісцкая групоўка «Ісламская дзяржава» узяла на сябе адказнасьць за забурэньні ў калёніі на поўначы Таджыкістану 7 лістапада, у выніку якіх загінулі як найменш 24 чалавекі. Заяву баявікоў распаўсюдзіла набліжанае да іх агенцтва Amaq.
Згодна з паведамленьнем, бунт паўстаў пасьля таго, як позна ўвечары член «ІД» напаў на ахоўніка турмы.
Крыніцы Радыё Свабода ў праваахоўных органах Таджыкістану паведамілі, што беспарадкі ў калёніі строгага рэжыму ў горадзе Худжанда арганізавалі прыхільнікі «Ісламскай дзяржавы», асуджаныя паводле абвінавачваньня ў рэлігійным экстрэмізме і тэрарызме.
Сярод загінулых — два ахоўнікі калёніі.
Пасьля інцыдэнту прайшло два дні, але ўлады краіны не рабілі афіцыйных заяваў з гэтай нагоды.
У гэтай калёніі ўтрымліваюцца асуджаныя за цяжкія злачынствы, у тым ліку за забойствы і тэрарызм.
