Лінкі ўнівэрсальнага доступу

У ЗША пачаліся пратэсты ў абарону спэцпракурора, які расьсьледуе ўмяшаньне Расеі ў выбары


Cпэцпракурор Робэрт Мюлер

Намесьнік генпракурора ЗША заявіў сёньня ў судзе, што Ўітакер можа звольніць Мюлера, калі будуць выкананыя некалькі ўмоваў, паведамляе «Голас Амэрыкі».

Адразу ў некалькіх буйных амэрыканскіх гарадах адбыліся акцыі пратэсту, удзельнікі перасьцерагаюць Белы дом ад звальненьня спэцпракурора Робэрта Мюлера, якія вядзе расьсьледаваньне магчымых сувязяў перадвыбарнай кампаніі прэзыдэнта ЗША Дональда Трампа з Расеяй.

Увечары 8 лістапада акцыі пад назвай «Хуткае рэагаваньне для абароны Мюлера» пачаліся ля Белага дома ў Вашынгтоне, у цэнтры Мангэтану, на плошчы Таймс-сквэр і ў іншых буйных амэрыканскіх гарадах.

У Нью-Ёрку, як піша Reuters, на акцыю выйшлі тысячы чалавек. Яны трымалі ў руках плякаты з надпісамі «Рукі прэч ад Мюлера» і «Ўітакер павінен узяць самаадвод».

Паводле інфармацыі часопіса Washingtonian, галоўны арганізатар пратэстаў — сетка праваабарончых арганізацый Nobody Is Above The Law ( «Ніхто ня можа быць вышэйшым за закон»). У групу ўваходзяць больш за 30 арганізацый па абароне грамадзянскіх правоў з усёй краіны.

Гэтыя ж актывісты, піша Washingtonian, арганізавалі ў чэрвені мінулага году агульнанацыянальную акцыю «Марш за праўду». Тады яны запатрабавалі ад Белага дома ўнесьці яснасьць у сытуацыю з расьсьледаваньнем магчымага расейскага ўмяшаньня ў выбары 2016 году.

Па словах сузаснавальніка праваабарончай сеткі Джордана Уля, падобныя акцыі праходзяць «у сотнях гарадоў» па ўсёй краіне. Чакаецца, што ў пратэстах возьмуць удзел да 400 тысяч чалавек, сьцьвярджаюць арганізатары.

Арганізатары пратэстаў абвінавачваюць прэзыдэнта Трампа ў тым, што ён прызначыў свайго «прысьпешніка» Мэта Ўітакера выконваць абавязкі генпракурора пасьля звальненьня Джэфа Сжшнса 7 лістапада. Уітакер цяпер мае паўнамоцтвы для назіраньня за справай аб расейскім ўмяшаньні, якую вядзе каманда спэцпракурора Робэрта Мюлера. Удзельнікі пратэстаў асьцерагаюцца, што Ўітакер можа перашкодзіць расьсьледаваньню.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG