На поўначы Таджыкістану пры задушэньні бунту ў калёніі строгага рэжыму, разьмешчанай у 16-м мікрараёне гораду Худжанд, загінулі сама меней 13 зьняволеных, паведамляе агенцтва Reuters са спасылкай на крыніцы ў сілах бясьпекі.
Беспарадкі ў турме пачаліся ўночы на 8 лістапада, паведаміла крыніца таджыцкай службы Радыё Свабода. Прычына бунту зьняволеных пакуль невядомая.
Бунтаўшчыкі былі ўзброеныя халоднай зброяй, адзначыла крыніца. У турму былі кінутыя сілы міліцэйскага спэцназу, бунт быў задушаны. Пачата расьсьледаваньне прычын здарэньня.
«Некалькі вязьняў пацярпелі пры спробе ўцёкаў. Некаторым удалося пакінуць тэрыторыю ўстановы», — сказала крыніца.
Паводле відавочцаў, на ўсіх дарогах гораду, а таксама на трасах, якія вядуць у суседнія Ўзбэкістан і Кіргізстан, стаяць узмоцненыя пасты сілавікоў.
Улады Таджыкістану пра бунт у калёніі пакуль не паведамляюць.
