«Белавія» ўвяла экспэрымэнтальныя тарыфы і зьнізіла цану квіткоў на асобных кірунках да 75%. Зьменшаныя тарыфы будуць дзейнічаць да 31 сакавіка.
Зьменшаныя тарыфы будуць даступныя на сайце belavia.by ад 2 лістапада пры ўмове набыцьця квіткоў мінімум за 45 дзён ад вылету. На сайце тарыфы будуць адлюстроўвацца ў графе «прома», падсьвечвацца зялёным сьвятлом і акрэсьлены лягатыпам кампаніі ў выглядзе васілька. Колькасьць месцаў абмежаваная
Экспэрымэнтальныя тарыфы будуць дзейнічаць у кірунках: Амстэрдам, Алматы, Астана, Брусэль, Бэрлін, Будапэшт, Ерэван, Жэнэва, Гановэр, Харкаў, Калінінград, Казань, Санкт-Пецярбург. Ларнака, Лёндан, Львоў, Мілян, Адэса, Парыж, Прага, Рым, Стакгольм, Сочы, Тбілісі, Тэль-Авіў, Белград, Ніжні Ноўгарад, Краснадар, Кішынёў.
Напрыклад, квіток у Барсэлёну каштуе 35 эўра ў адзін бок, а 86 эўра — у два бакі, Лёндан — 35 і 95 эўра, Брусэль — 45 і 79 эўра.
У «Белавіі» гэтую акцыю зрабілі з нагоды 85-годзьдзя грамадзянскай авіяцыі, сказала Свабодзе прэс-сакратарка кампаніі Вольга Шчуко. Ці будуць падобныя акцыі ў далейшым, будзе залежыць ад попыту.
«Мы не лоўкост-кампанія», – адзначыла Вольга Шчуко.
У суседніх зь Беларусьсю краінах працуе шэраг лоўкостэраў — авіякампаній, якія прапануюць палёты па мінімальных цэнах, але бяз большасьці дадатковых паслуг для пасажыраў, нярэдка ў далёкія ад папулярных гарадоў аэрапорты. У Беларусь лоўкосты практычна ня лётаюць, няма і беларускай лоўкост-кампаніі — прычыны гэтага называюць самыя розныя.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў