За мінулы год беларускія лекары дыягнаставалі інсульт у 33 тысяч чалавек. 14% пацыентаў памерлі.
Галоўны пазаштатны спэцыяліст у нэўралёгіі Міністэрства аховы здароўя Беларусі Людміла Анацкая зазначыла, што сьмяротнасьць 14% адпавядае эўрапейскім стандартам.
78% інсультаў у Беларусі здараецца пасьля 65 гадоў. Ва ўзросьце ад 65 да 80 гадоў інсульт пераносяць кожная 5-я жанчына і кожны 6-ы мужчына. Пасьля 80 становішча выраўноўваецца.
Правіла «залатога часу»
Загадчыца нэўралягічнага аддзелу лякарні хуткай дапамогі ў Менску Юлія Шабаліна расказала пра так званы «залаты час» — гэта тэрмін ад 3 да 4 з паловай гадзін з моманту, калі здарыўся інсульт. Зварот да лекараў менавіта ў гэты час найбольш спрыяльны для ачуньваньня.
Паводле лекараў, апошнім часам інсульт істотна маладзее. Так, летась у Менску гэтая хвароба выяўленая ў маладых жанчын, наймаладзейшай зь якіх быў усяго 21 год. Павялічваецца колькасьць інсультаў і ў мужчын, асабліва пасьля 40.
Дарожная мапа для барацьбы з інсультам
Каб дамагчыся посьпеху ў барацьбе з інсультамі, у Беларусі стварылі адмысловую дарожную мапу. У кожнай вобласьці існуе ня меней за 5 міжраённых судзінных цэнтраў. Менавіта туды прывозяць пацыентаў з інсультамі з усіх куткоў Беларусі. Прычым праграма разьлічаная так, што пацыент павінен быць дастаўлены ў судзінны цэнтар не пазьней як праз гадзіну пасьля таго, як у яго дыягнаставалі інсульт.
