У працы форуму возьмуць удзел каля 100 прадстаўнікоў акадэмічнай сфэры, бізнэсу, экспэртнай супольнасьці і афіцыйных структур Літвы і Беларусі.
Хто арганізатары і сьпікеры
Арганізатарамі выступаюць муніцыпалітэт гораду Клайпеды, Клайпедскі ўнівэрсытэт, Форум дыялёгу і супрацоўніцтва імя Ежы Гедройця (Літва), Інстытут Вялікага Княства Літоўскага (Коўна, Літва), Інстытут «Палітычная сфэра» (Менск, Беларусь).
На форуме выступяць вядомыя літоўскія інтэлектуалы: Альфрэдас Бумблаўскас, Артурас Дубоніс, Дангірас Мачуліс, Віціс Юрконіс; прадстаўнікі афіцыйных структур і бізнэсу Рэнатас Пажэла (камандзір Службы аховы дзяржаўнай мяжы Літвы), Эвэліна Гудзінскайце (дырэктар Дэпартамэнту міграцыі МУС Літвы), мэр Клайпеды Вітаўтас Грубляўскас і мэр Друскенікаў Рычардас Малінаўскас.
Місія форуму
Андрэй Казакевіч, дырэктар Інстытуту палітычных дасьледаваньняў «Палітычная сфэра», навуковы супрацоўнік Унівэрсытэту Вітаўта Вялікага, адзначае, што, хоць Беларусь і Літва — суседзі, краіны маюць агульную гісторыю, стасункі паміж імі не пазбаўлены праблем.
«Існуе напружанасьць на афіцыйным узроўні, якая вельмі часта адзначаецца ў недзяржаўных мэдыя і адбіваецца на грамадзкай сьвядомасьці. Пры гэтым не існуе пляцовак, дзе прадстаўнікі грамадзкасьці — інтэлектуалы, бізнэсоўцы, экспэрты, мясцовыя ўлады — маглі б дыскутаваць у публічным фармаце, рабіць гэта рэгулярна і з шырокім прадстаўніцтвам СМІ.
Місія форуму — дапамагчы ў вырашэньні гэтай праблемы і стаць рэгулярнай пляцоўкаю камунікацыі паміж прадстаўнікамі розных частак беларускага і літоўскага грамадзтва. Камунікацыі найперш публічнай, адкрытай для СМІ, якая зьвяртае ўвагу на выклікі і новыя магчымасьці ў супрацоўніцтве дзьвюх краін», — кажа адзін з арганізатараў форуму Андрэй Казакевіч.
Асноўныя тэмы
Дыскусіі, круглыя сталы пройдуць у розных праблемах:
- Гістарычная памяць, якая яднае і разлучае;
- Вільня — горад, які аб’ядноўвае літоўцаў і беларусаў;
- Вітаўт і Грунвальд — нацыянальныя міты, якія злучаюць;
- Тадэвуш Касьцюшка і Кастусь Каліноўскі — міты, якія абʼядноўваюць літоўцаў і беларусаў;
- Вялікае Княства Літоўскае — агульная літоўска-беларуская дзяржава;
- Межы і міграцыя: выклікі і магчымасьці;
- Бізнэс як сродак, што абʼядноўвае літоўцаў і беларусаў.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў