Лінкі ўнівэрсальнага доступу

Дзе нуль, а дзе плюс? Віцэ-прэм’ер Ляшэнка сказаў, што Расея павялічыць пастаўкі нафтапрадуктаў Беларусі


Ілюстрацыйнае фота

Віцэ-прэм’ер Беларусі Ігар Ляшэнка заявіў 12 кастрычніка, што пастаўкі нафтапрадуктаў з Расеі павялічацца ў 2019 годзе на 10% да ўзроўню 2017 году.

Паводле Ляшэнкі, беларускі бок «гэта задавальняе для забесьпячэньня загрузкі магутнасьцяў і вытворчасьці прадукцыі зь неабходнымі тэмпамі ВУП».

Такая заява прагучала пасьля таго, як стала вядома, што Расея ўводзіць забарону на экспарт шэрагу нафтапрадуктаў у Беларусь да канца 2019 году

11 траўня кіраўнік расейскага Міністэрства энэргетыкі Аляксандр Новак заявіў, што Расея ня будзе пастаўляць Беларусі бэнзін, дызэль і мазут зь лістапада 2018 году да канца 2019-га. Гэта абумоўлена падпісаным раней індыкатыўным балянсам на пастаўкі нафтапрадуктаў да канца 2019 году.

«Што тычыцца аўтабэнзіну, дызэльнага паліва, мазуту — у індыкатыўныя балянсе прадугледжаны нулявыя паказчыкі», — сказаў расейскі міністар.

Дысананс у заявах прадстаўнікоў Беларусі і Расеі карэспандэнту Свабоды патлумачылі ў прэс-службе Міністэрства энэргетыкі Расеі.

«Беларускі віцэ-прэмʼер кажа пра ўсе нафтапрадукты. Па бэнзіне, дызелі і мазуце прадугледжаны нулявыя паказчыкі ў індыкатыўным балянсе. Але для агульнага складу нафтапрадуктаў, дзе могуць быць і іншыя, там насамрэч можа быць плюс. Але па цёмных,напрыклад,ідзе нуль».

У расейскім міністэрстве зноў спаслаліся на ранейшую заяву Аляксандра Новака.

Забарону на пастаўкі нафтапрадуктаў у Беларусь у канцэрне «Белнатфахім» пакуль не камэнтуюць.

Прэс-сакратар прэм’ер-міністра Беларусі Ўладзіслаў Сычэвіч таксама не пракамэнтаваў сытуацыю.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG